/* Adsense code */ /* End - Adsense code */
తెలుగు మనది వెలుగు మనది! తెలుగు మాట్లాడు! తెలుగు వ్యాప్తి చెయ్యి!

Saturday, January 1, 2022

పంచబేరాలు: తిరుమలలో కొలువై వున్న శ్రీనివాస మూర్తుల విగ్రహాలు

తిరుమలలో శ్రీ వేంకటేశ్వరస్వామికి జరిగే నిత్య కైంకర్యాలన్ని ఆగమ శాస్త్ర అనుసారం జరుగుతాయి. తిరుమ‌ల గ‌ర్భాల‌యం ఆనంద నిలయంలో స్వయంవ్యక్తమైన మూలవిరాట్టుతో పాటు మరో నాలుగు శ్రీనివాస మూర్తుల విగ్రహాలు కొలువై ఉంటారు. శ్రీ వారి విగ్రహంతో పాటు ఈ నలుగురు మూర్తులు పంచబేరాలు అంటారు. బేర అంటే విగ్రహం. వీరికి మూలవిరాట్టుతో పాటు నిత్యం ప్రత్యేక పూజలు, నివేదనలు సాగుతున్నాయి. ఈ పంచబేరాలు విష్ణువు యొక్క మహారూపాలైన విష్ణువు, మహావిష్ణు, సదావిష్ణు వ్యాపి నారాయణులకు సంకేతంగా పండితులు భావిస్తారు.

ధృవబేర:

తిరుమల కొండపై శ్రీవారి యొక్క దివ్వ సాలిగ్రామ బింబం. ఇది స్వయంభుగా వెలిసినది. ఈ మూల‌విరాట్టుని ధృవబేర అని అంటారు. ఈ విగ్రహం తిరుమల కొండపై స్వయంగా వెలిసినట్లుగా చెపుతారు. అత్యంత శక్తి వంతమైన ఈ విగ్రహానికి నిత్యం పూజలు జరుపుతూ వారానికి ఒక్కసారి అర్చకులు ఆగమపండితులు అతి పవిత్రంగా అభిషేకాలను నిర్వహిస్తారు. ఈ స్వయంభుగా విగ్రహాన్ని కదల్చడానికి వీలు ఉండదు. అందువలన ఉత్సవాల సందర్భములలో ఊరేగింపులకు వేరే విగ్రహాలను ఉపయోగిస్తారు.

కౌతుకబేర:

శ్రీవారి గర్భాలయంలో మూలవిరాట్టు పాదాల వద్ద ఉండే వెండి విగ్రహాన్ని కౌతుకబేర అని అంటారు. ఈ విగ్రహాన్ని పదిహేను వందల సంవత్సరాల క్రితం సమవై అనే పల్లవరాణి సమర్పించినట్లుగా శాసనాల ద్వారా తెలుస్తుంది. ఈ విగ్రహమే భోగ శ్రీనివాసమూర్తిగా పిలువబడుతోంది. ప్రతి రోజూ జరిగే తోమాల సేవలో, రాత్రి పూట జరిగే ఏకాంత సేవలో ఈ భోగ శ్రీనివాసమూర్తిని ఉపయోగిస్తారు. అలాగే ప్రతి బుధవారం ఆలయంలో జరిగే సహశ్ర కలశాభిషేకం సేవ ఈ స్వామి వారికే జరుగుతుంది. ఈ భోగ శ్రీనివాసమూర్తిని ఆలయం లోపల నుండి బయటకు తీసుకురారు.

ఉత్సవబేర:

తిరుమల శ్రీ వెంకటేశ్వర స్వామి యొక్క ఉత్సవ మూర్తిని ఉత్సవబేర అని పిలుస్తారు. ఈ స్వామి వారినే మలయప్ప స్వామి అంటారు. 700 సంవ‌త్స‌‌రాల‌కు పూర్వం నాటి ఒక శాస‌నంలో మలయప్ప స్వామి ప్రసక్తి ఉన్నది. పూర్వం ఒకానొక సందర్భములో స్వామివారు ఒక భ‌క్తుని ద్వారా త‌న సందేశాన్ని వినిపించాడ‌ని అంటారు. ఆ సం‌దేశానుసారం శ్రీవారి ఆలయానికి ఈశాన్య దిక్కులో ఒక కొండ వంగి ఉండే ప్రదేశంలో శ్రీదేవి భూదేవి స‌హిత వేంక‌టేశ్వరుని విగ్రహం లభించింది. శ్రీదేవి, భూదేవి విగ్రహాలను ఉభయ నాంచారులు అని పిలుస్తారు. ఈ స్వామివారికి త‌మిళంలో `మ‌లై కునియ నిన్ర పెరుమాళ్‌` (అనగా త‌ల‌వంచిన ప‌ర్వతం మీద కొలువైన స్వామి) అని పిలువసాగారు. కాలక్రమం‌లో మల‌య‌ప్పస్వామిగా మారింది. శ్రీవారి ఆలయంలో జరిగే కళ్యాణోత్సవం, సహస్ర దీపాలంకరణ, పుష్కరిణిలో జరిగే తెప్పోత్సవం ఈ మలయప్పస్వామి వార్లకే జరుగుతాయి. బ్రహ్మోత్సవాల సందర్భముగా తిరు మాడ వీధులలో జరిగే ఊరేగింపుల సంద‌ర్భంగా ప్రతి రోజూ ఆలయం వెలుపలకు వచ్చి మాడవీదుల్లో ఊరేగుతూ భ‌క్తుల‌కు ఆశీస్సుల‌ను అందిస్తారు.

బలిబేర:

తిరుమల గర్బగుడిలో ఉండే శ్రీవారి చిన్న విగ్రహం. ఈయన కొలువు శ్రీనివాసుడు. మూల విరాట్‌కు తోమాల సేవ అనంతరం కొలువు శ్రీనివాసుని బంగారు వాకిలి వద్ద ఆలయ మండపానికి తీసుకువచ్చి రోజువారి కొలువు జరిపిస్తారు. కొలువులో మొదటిగా పంచాం‌‌గం శ్రవణం చేసి, తరువాత శ్రీవారి హుం‌‌‌డీ ద్వారా వచ్చే ఆదాయాలు, భక్తులు ఇచ్చిన కానుకల వివరాలను చదివి వినిపిస్తారు. ఈ కొలువు శ్రీనివాసమూర్తిని ఆలయం లోపల నుండి బయటకు తీసుకురారు.

ఉగ్రబేర:

గర్బగుడిలో ఉండే ఉగ్ర శ్రీనివాసుడుని 11వ శతాబద్దం వరకు ఉత్సవ విగ్రహంగా పూజించినారు. ఈయన శ్రీదేవీ భూదేవి సహితుడై భక్తులకు దర్శనమిస్తాడు. ఈయననే స్నపన బేర అనికూడా పిలుస్తారు.

Tuesday, December 7, 2021

విష్వక్సేనుడు: శ్రీమహా విష్ణువు సర్వసైన్యాధిపతి

తిరుమల శ్రీవారికి నిర్వహించే నిత్య కైంకర్యాలలో విష్వక్సేనులది ప్రధాన పాత్ర. సాక్షాత్తు శ్రీమహావిష్ణువు స్వరూపంగా భావించే విష్వక్సేనుని ఎవరు ఆరాధిస్తారో వారికి ఎలాంటి ఆపదలు ఉండవని వైఖానస ఆగమం చెబుతోంది. అసలు విష్వక్సేనుడు ఎవరో తెలుసుకుందాం!

శైవులు గణపతిని తొలిగా పూజించి అగ్రతాంబూలాన్ని సమర్పించినట్టుగానే వైష్ణవులు విష్వక్సేనుని ప్రతి కార్యంలోను పూజిస్తారు. శివ గణాలకు అధిపతి విఘ్నేశ్వరుడు అయితే, విష్ణు గణాలకు అధిపతి విష్వక్సేనుడు.

కూర్మ పురాణం ప్రకారం విష్వక్సేనుడు చూడటానికి విష్ణుమూర్తిలాగానే ఉంటాడు. ఈయనకి కూడా నాలుగు చేతులు ఉంటాయి. రెండు చేతుల్లో శంఖచక్రాలు, మూడవ చేతి చూపుడు వేలు పైకి చూపిస్తూ ఉంటుంది, నాలగవ చేతిలో గద ఉంటుంది. తన యజమాని వలె పసుపు రంగు దుస్తులు ధరించి ఉంటాడు. శ్రీ మహావిష్ణువుకు శ్రీవత్సం ఉంటే, విష్వక్సేనుడికి అవి ఉండవు. అలాగే కాళికా పురాణం, పాంచరాత్ర గ్రంథం లక్ష్మీ తంత్రం మరియు ఇతర ఆగమ గ్రంథాలలో విశ్వక్సేనుని గురించి ప్రస్తావించబడింది.

తిరుమలలో వెంకటేశ్వరస్వామి వారి ఆలయం‌లో ముక్కోటి ప్రదక్షిణంలో ప్రధాన ఆలయానికి ఉత్తరం వైపున విష్వక్సేనుడి ఆలయం ఉంది. సంవత్సరానికి వైకుంఠ ఏకాదశి, వైకుంఠ ద్వాదశి రెండు రోజులు మాత్రమే ఈ ముక్కోటి ప్రదక్షిణ ప్రాంతాన్ని తెరిచి ఉంచడం జరుగుతుంది. తిరుమలలో జరిగే బ్రహ్మోత్సవాలలో ముందుగా విష్వక్సేనుని ఆరాధించడంతో ప్రారంభమవుతుంది. ఈ సందర్భంగా ఈయన కాంస్య చిహ్నాన్ని ఆలయ ప్రాంగణం చుట్టూ నాలుగు మాడ వీధులలో ఊరేగింపుగా తీసుకువెళతారు. ఈ విధంగా చేయడం వలన విష్వక్సేనుడు ఉత్సవానికి తగిన ఏర్పాట్లు చేస్తాడని మరియు ఉత్సవాలు సజావుగా జరిగేలా చూస్తాడని భక్తులు నమ్ముతారు.

తిరుమలలోనే కాకుండా వైష్ణవ ఆలయాలు శ్రీరంగం‌లోని రంగనాథ ఆలయం, కాంచీపురంలోని వరదరాజ పెరుమాళ్ దేవాలయాలలో కూడా విష్వక్సేనుకి ప్రముఖ స్థానం కలదు. శ్రీరంగం దేవాలయ ఉత్సవాల్లో ప్రధాన ఊరేగింపు ప్రారంభానికి ముందు వీధులను పరిశీలిస్తున్నట్లుగా విష్వక్సేనుని ఊరేగిస్తారు. కాంచీపురంలోని వరదరాజ పెరుమాళ్ దేవాలయం యొక్క ఆలయ ఉత్సవం బ్రహ్మోత్సవాలకు ముందు రోజున విష్వక్సేనుని ఊరేగింపుతో ప్రారంభమవుతుంది, దీనిని సేన ముదలియార్ అని పిలుస్తారు

సర్వసైన్యాధిపతి అయిన విష్వక్సేనున్ని ఎవరైతే ఆరాధిస్తారో, వారికి ఎలాంటి విఘ్నాలు, ఆపదలు, కష్టాలు కలుగవని వైఖానస ఆగమం చెబుతోంది.

Monday, September 27, 2021

శివాష్టోత్తరం

ఓం శివాయ నమ:
ఓం మహేశ్వరాయ నమ:
ఓం శంభవే నమ:
ఓం పినాకినే నమ:
ఓం శశిరేఖరాయ నమ:
ఓం వామదేవాయ నమ:
ఓం విరూపాక్షాయ నమ:
ఓం కపర్దినే నమ:
ఓం నీల లోహితాయ నమ:

ఓం శంకరాయ నమ:
ఓం శూలాపాణినే నమ:
ఓం ఖట్వాంగినే నమ:
ఓం విష్ణువల్లభాయ నమ:
ఓం శిపివిష్టాయ నమ:
ఓం అంబికానాథాయ నమ:
ఓం శ్రీకంఠాయ నమ:
ఓం భక్తవత్సలాయ నమ:
ఓం భవాయ నమ:

ఓం శర్వాయ నమ:
ఓం త్రిలోకేశాయ నమ:
ఓం శితికంఠాయ నమ:
ఓం శివాప్రియాయ నమ:
ఓం ఉగ్రాయ నమ:
ఓం కపాలినే నమ:
ఓం కౌమారినే నమ:
ఓం అంధకాసురసూదనాయ నమ:
ఓం గంగాధరాయ నమ:

ఓం లలాటాక్షాయ నమ:
ఓం కాల కాలాయ నమ:
ఓం కృపానిధయే నమ:
ఓం భీమాయ నమ:
ఓం పరశుహస్తాయ నమ:
ఓం మృగపాణివే నమ:
ఓం జటాధరాయ నమ:
ఓం కైలాసవాసినే నమ:
ఓం కవచినే నమ:

ఓం కఠోరాయ నమ:
ఓం త్రిపురాంతకాయ నమ:
ఓం వృషాంకాయ నమ:
ఓం వృషభారూఢాయ నమ:
ఓం భస్మోద్దూళితవిగ్రహాయ నమ:
ఓం సామప్రియాయ నమ:
ఓం సర్వమయాయ నమ:
ఓం త్రయీమూర్తయే నమ:
ఓం అనీశ్వరాయ నమ:

ఓం సర్వజ్ఞాయ నమ:
ఓం పరమాత్మాయ నమ:
ఓం సోమసూర్యాగ్నిలోచనాయ నమ:
ఓం హవిషే నమ:
ఓం యజ్ఞమయాయ నమ:
ఓం సోమాయ నమ:
ఓం పంచవక్త్రాయ నమ:
ఓం సదాశివాయ నమ:
ఓం విశ్వేశ్వరాయ నమ:

ఓం వీరభద్రాయ నమ:
ఓం గణనాథాయ నమ:
ఓం ప్రజాపతయే నమ:
ఓం హిరణ్యరేతాయ నమ:
ఓం దుర్ధర్షాయ నమ:
ఓం గిరీశాయ నమ:
ఓం అనఘాయ నమ:
ఓం భుజంగభూషణాయ నమ:
ఓం భర్గాయ నమ:

ఓం గిరిధన్వినే నమ:
ఓం గిరిప్రియాయ నమ:
ఓం కృత్తివాసాయ నమ:
ఓం పురారాతయే నమ:
ఓం భగవతే నమ:
ఓం ప్రమధాధిపాయ నమ:
ఓం మృత్యుంజయాయ నమ:
ఓం సూక్ష్మతనవే నమ:

ఓం జగద్వ్యాపినే నమ:
ఓం జగద్గురవే నమ:
ఓం వ్యోమకేశాయ నమ:
ఓం మహాసేనజనకాయ నమ:
ఓం చారువిక్రమాయ నమ:
ఓం రుద్రాయ నమ:
ఓం భూతపతయే నమ:
ఓం స్థాణవే నమ:
ఓం అహిర్బుధ్యాయ నమ:

ఓం దిగంబరాయ నమ:
ఓం అష్టమూర్తయే నమ:
ఓం అనేకాత్మనే నమ:
ఓం సాత్త్వికాయ నమ:
ఓం శుద్ధవిగ్రహాయ నమ:
ఓం శాశ్వతాయ నమ:
ఓం ఖండపరశవే నమ:
ఓం అజాయ నమ:
ఓం పాశవిమోచకాయ నమ:

ఓం మృడాయ నమ:
ఓం పశుపతయే నమ:
ఓం దేవాయ నమ:
ఓం మహాదేవాయ నమ:
ఓం అవ్యయాయ నమ:
ఓం హరయే నమ:
ఓం పూషదంతభేత్రే నమ:
ఓం అవ్యగ్రాయ నమ:
ఓం దక్షాధ్వర హరాయ నమ:

ఓం హరాయ నమ:
ఓం భగనేత్రభిదే నమ:
ఓం అవ్యక్తాయ నమ:
ఓం సహస్రాక్షాయ నమ:
ఓం సహస్రపాదవే నమ:
ఓం అపవర్గప్రదాయ నమ:
ఓం అనంతాయ నమ:
ఓం తారకాయ నమ:
ఓం పరమేశ్వరాయ నమ: